د کاتب پوهنتون او فاوا پارک ترمنځ د دوه اړخیزو او څو اړخیزو همکاریو ساحې وڅیړل شوې

د دغې غونډې په پيل کې د دغه پوهنتون د محصلانو چارو مرستيال ډاکتر محمد شاه اميد  فاوا پارک سره د اړيکو له ټينګېدو څخه د خوښۍ په څرګندولو سره د کاتب پوهنتون لنډه پېژندنه وړاندې کړه. هغه د کاتب پوهنتون او د معلوماتو او مخابراتو ټکنالوژی پارک دوه اړخیزه همکاري د نړۍ له عصري ټکنالوژۍ سره د کاتب پوهنتون د همغږي کولو په لاره کې یو بنسټیز ګام وباله.

د دغې غونډې په دوام کې د فاوا پارک د نړیوالو چارو مشاور ډاکټر عباس قنبري باغستان  له افغانستان سره د یوه ګاونډي هېواد په توګه چې له ایران سره د پام وړ مشترکات لري د پارک د اړیکو اهمیت ته اشاره وکړه. هغه د پارک  فعالیتونه لکه د منځپانګې تولید، د IOT ټکنالوژۍ، د پروپولشن پروژې او د پارک غړي ټکنالوژیست شرکتونو تشریح کړل او همدارنگه د خوړو خوندیتوب کې د فاوا پارک رول هم بیان کړ.

ډاکټر قنبري په افغانستان او په ځانګړې توګه د کاتب پوهنتون د تشبث په رامنځته کولو کې د ډیجیټل منځپانګې د تولید رول تشریح کړ او ویې ویل: د ډیجیټل منځپانګې د تولید سټوډیو جوړول، زده کوونکو ته د عملي پوهې د برابرولو ترڅنګ، په افغانستان کې د کار زمینه هم برابروي.

ورپسې د کمپیوټر د ساینس پوهنځي رئیس ډاکټر داود فروتن د دغه پوهنځي د معرفي کولو پرمهال د کمپیوټر ساینس پوهنځي د محصلینو پر وړاندې پرتې ستونزې او خنډونه مطرح کړل او د فاوا پارک د ډیجیټل اقتصاد د پراختیا شبکې د جوانه گرنت په اړه یې د لا زیاتو معلوماتو غوښتنه وکړه.

ورپسې د کاتب پوهنتون د څېړنو رئیس او د دغه پوهنتون د انجینرۍ پوهنځي د رئیس له خوا د څېړنیزو فعالیتونو، سمارټ شنې خونې او د فاوا پارک د فاضله اوبو د تصفیې د فابریکې په اړه پوښتنې مطرح شوې او دغه راز يې له فاوا پارک څخه په کاتب پوهنتون کې د پوهنتون د پارک د جوړولو په اړه د مشورې غوښتنه وکړه.

ورپسې ډاکټر قنبری د ساینس او ټکنالوژۍ پارک د جوړولو بهیر تشریح کړ او ویې ویل: د دې په پام کې نیولو سره چې کاتب پوهنتون تر اوسه د ساینس او ټکنالوژۍ پارک نه درلوده، ممکن دا به ښه نظر نه وي چې په مستقیم ډول د ساینس او ټکنالوژۍ پارک جوړ کړي، او موږ تاسو ته دا وړاندیز نشو کولی. تاسو باید لومړی د ټکنالوژۍ له مرکز څخه پیل وکړئ. دا مرکز به محصول تولیدوي، د ودې مرحلې ته به یې  ورسوي او بیا به خپل محصول وپلوري. که تاسو په دې برخه کې یو څو بریالۍ تجربې ولرئ، ډیر ژر به بازار یا صنعت د ټکنالوژۍ په برخه کې د لا زیاتو نظریاتو او همدارنګه ستاسو په پوهنتون کې د ټکنالوژۍ ساحې پراختیا ته پام وکړي او پانګونه به وکړي.

ډاکټر قنبری د پارک او کاتب پوهنتون ترمنځ د څو اړخیزو همکاریو د امکان یادونه وکړه او ویې ویل: دې ته په پام سره چې نړیوال بانک، ملګري ملتونه او یونسکو له افغانستان سره په بېلابېلو برخو کې همکاري کوي، دا کار د څو اړخیزو همکاریو په بڼه ترسره کېدای شي.

د بېلګې په توګه کاتب پوهنتون په پام کې لري چې په افغانستان کې د اختراع یو مرکز جوړ کړي، د دغه مرکز مالي لګښت به د ملګرو ملتونو له خوا ورکول کېږي او علمي او لوژستیکي مسایل به یې د فاوا پارک له خوا ورکول کېږي.

په پای کې د کاتب پوهنتون علمی هیئت د ډاکټر قنبري د خبرو د تاییدولو په ترڅ کې د فاوا پارک له لیوالتیا څخه چې د دغه پارک لاسته راوړنې له افغانستان سره شریکوي مننه وکړه او پرېکړه وشوه چې د کاتب پوهنتون او فاوا پارک ترمنځ به د لا زیاتو غونډو په ترڅ کې عملي چارې پیل شي.

د یادولو وړ ده؛ په دې غونډه کې د کاتب پوهنتون د محصلانو د چارو مرستیال ډاکټر محمد شاه امید، د کاتب پوهنتون د انجینرۍ پوهنځي رئیس ډاکټر هادي فصيحي، د کاتب پوهنتون د کمپیوټر ساینس پوهنځي رئیس ډاکټر داوود فروتن، د کاتب پوهنتون د څېړنيز مرکز  رئیس ډاکټر براتی، د فاوا پارک د نړيوالو چارو مشاور ډاکټر عباس قنبري باغستان، د فاوا پارک عامه اړیکو کارپوه مېرمن مينا راستي او د فاوا پارک د نړيوالو چارو کارپوه سيد نبي سجادي هم شتون درلود.